O le alofa e na o upu ae leai se tino fai mai isi e lē o se alofa e moni, ae o le to’atele o tatou e matuā talia ma le fiafia ma le faafetai le alofa e iai le tino.
O le autu lea o le a’oa’oga a le Faaola ua faatāua e le ekalesia a Iesu Keriso o le Au Paia o Aso e Gata ai i le latou foa’i e 300 nofoa faataavalevale poo wheelchairs, o tootoo, o walker ma isi vaega tāua faapea e mana’omia tele e tagata i lo tatou atunuu ua iai ni faaletonu ma lē atoatoa le malosi o le tino.
O se pusaoloa na aumai ai lea foa’i tāua ua tuuina atu i le Malo e ala i le Matagaluega o le Soifua Maloloina, e faasoa i tagata o loo mana’omia ni nofoa faataavalevale ma ia vaega ona ua lē gafatia se seleni e faatau ai, auā e taugata. Ua faailoa e le ekalesia i se pepa o faasalalauga, o se faiga paaga ua loa tausaga o faia ma le Malo o loo faaauala atu ai lea fesoasoani. Ua faafetai ai e le ekalesia ona tagata lotu i soo se itu o le lalolagi na agalelei i le tuu faatasia o lea foa’i.
O le alii foma’i o le sui Faatonu Sili o le Matagaluega o le soifua maloloina le susuga Atoa Dr Glenn Fatupaito na ia taliaina le agalelei o le ekalesia a Iesu Keriso o le Au Paia o Aso e Gata ai.
