E $30 miliona tala Niu Sila le fesoasoani tupe a Niu Sila mo Fiti lea ua fofola atu e Nanaia Mahuta i le laulau ananafi a o iai i Fiti.
O lenei fesoasoani ua faia e saga faamalosia ai pea faiga faapaaga i le va o malo e lua, ma na faailoa ai e le minisita o le va i fafo a Niu Sila i le mae’a feiloai ma le Palemia o Fiti, Sitiveni Rabuka.
O le uluai taimi lea ua feiloai ai le minisita mai Niu Sila ma le faigamalo fou a Fiti ua iai nei talu ona tu mai i le foe mai ia Tesema o le tausaga talu ai.
O le $20 miliona o lea vaegatupe o le a fesoasoani ai ia Fiti i suiga o le tau, ae o le isi $10 miliona e mo atinae.
Ua faafetaia ai e le Palemia o Fiti le manatu atu o Niu Sila aemaise o le amanaia pea o la laua faigauo.
O le fesoasoani mo Fiti ua faia ai i le mae’a foaia foi e Niu Sila o fesoasoani tupe lava foi faapenei mo Samoa, Tonga ma le Atu Kuki.
O se avanoa foi ua faafetaia aloaia ai e Niu Sila le agalelei mai o Fiti i taimi o le afā o Gabrielle e pei ona aumai ai le 34 o ona tagata e fesoasoani i galuega faamama.
