I le tausaga e 2016 na maliu ai Sauaga Iese o A’ele ma tuua’ia ai se gaioiga solitulafono e fesootai i le fano o lona soifua, ua le faaauauina ona suesue moliaga o lē sa molia, i le savalia ai nei o le fitu tausaga talu ona maliu Sauaga, ina ua talia e le faamasinoga le talosaga a loia a leoleo, e toe faaui uma i tua moliaga.
O le mafuaaga e pei ona faailoa e loia a leoleo, o nisi o a latou molimau autu na malaga i galuega faavaitaimi ia Novema o le tausaga na tea nei, ma le tasi o mafuaaga ua manao le aiga o lē ua maliu e toe ave i tua le tagi.
Ua faailoa ai se faanoanoaga o le afioga i le faamasino o le Faamasinoga Sili le susuga Leiataualesa Darrel Clarke, ona o le vaiaso na tea nei na faatulaga e suesue ai molimau o le mataupu, ae ua aliali le faaletonu o tapenaga a leoleo, pe a fua atu ua faasefulu i le sefulutasi ona faatulaga aso e suesue ai mau, talu mai le tausaga e 2017 ae ua faatalalē ma lē magafagafa leoleo i le lava tapena o vaega uma mo le suesueina o moliaga o Steve Afiafi Faatasi o A’ele ma Auala sa tuua’ia.
O mafuaaga ua tuuina atu e loia a leoleo e ao ai ona toe faasolomuli moliaga, ua talia ma ua saoloto ai nei lē sa molia.
