E fitu afā ua faailoa e le ofisa vaaitau a le atunuu o Fiti o loo maua ai foi e Samoa lipoti o faamatalaga i taimi o le louloua o uiga o le tau, o le a ono aafia ai motu o le Pasefika mai ia Novema e oo ia Aperila o le tausaga fou 2023.
O le fa o ia afā, ua valoia foi e matua malolosi peitai ua faailoa i se lipoti a le leitio faavaomalo a Niu Sila ua faailoa e le vaaitau a Fiti le vaaiga mamao o le tulaga o loo taoto ai uiga o le tau ua ta’ua o le La Nina, ina ia vave tapenapena ai atunuu i tulaga masani, ma vave ai ona maua faamatalaga e tagata mo le latou silafia, a o lumanai le masina fou o Novema.
I le auaunaga a le ofisa vaaitau i Samoa, o anapo poo le lata i le iva, na luluina ai lo tatou atunuu i se mafuie e tusa lona malosi ma le 5 tesimale 7 e pei ona faamauina i le masini e fua ai le malosi o mafuie.
O le malosi o lea mafuie sa lagona e le toatele, ae o lona mamao ese ma Samoa e pei ona faailoa e le ofisa vaaitau e 194 tesimale 84 kilomita i Saute i Sisifo.
E leai se lapataiga o se sunami e mafua mai i lea mafuie.
