E manatu se tasi o taitai mai le komiuniti a Tonga, Pakilau Manase Lua o tagata ua ova aso i le atunuu i vaega ua matuai faaleagaina i le afā e tatau ona ave iai se avanoa amnesty, auā e faapei foi lava latou o isi tagata i le komiuniti ma e le taumate o loo manaomia se fesoasoani ae ua fefe e faailoa ona o popolega i le toe faafoi o i latou i o latou atunuu.
Fai mai Pakilau o loo ia popole i le saogalemu o nai nei tagata ma ua valaau ai i le malo mo se fesoasoani faapea e faia iai, na ia ta’ua e le taumate o loo iai nisi o i latou ia na malaga mai i galuega faavaitaimi peitai ua ova aso ua aumau ai nai lo le visa sa faatagaina ane mo latou ma ua ta’ua e iai nisi o i latou ia sa iai i le faaitu o Hawke’s Bay ma Gisborne.
Na ta’ua foi e Pakilau afai ae faamatuu ane e le malo o Niu Sila sea avanoa mo ia tagata e le taumate o le fesoasoani tele lea i galuega faamamā o loo faia nei i nofoaga o loo aumau ai ua faaleagaina i le afā.
