O loo faalauiloa nei ma una’ia e le faipule o le Green i Niu Sila nei Teanau Tuiono se private members bill ua faamoemoe o le a aveesea ai se tulafono faailogalanu na faalauiloa i le 1982. 

Fai mai le RNZ o le faamoemoe o le pili ina ia aveesea ai le Citizenship Act 1982 e faatatau ia  Samoa ma o le tulafono lea sa vaoia ai le avea o tagata Samoa sa soifua ane i le va o le 1924 ma le 1949 mai le avea o i latou ma sitiseni o Niu Sila, e ui sa iai se faai’uga mai le Privy Council o tagata Samoa na soifua ane i le piliota lea a o vaaia e Niu Sila Samoa, e mafai i le taimi lea ona ta’ua o sitiseni o Niu Sila. 

Fai mai Tuiono i lea lipoti o le pili lea o loo ia lagolagoina o le a faamuta ai le tulafono lea na te faaigoaina o le tulafono faailogalanu ma a o faamanatu ai foi le 60 tausaga  o le Treaty of Friendship i le va o atunuu e lua, Niu Sila ma Samoa, o se auala lelei lea e agai ai i luma mai lenei mataupu pe afai e talanoa i tulaga o faigauo.  

Ua lipotia ai foi i le tusitusiga lea se finagalo o se tasi o tamalii Samoa sa avea foi ma faipule Fepuleai Semi Fepuleai e faapea o le pili lea o le a faasa’o ai sese mai le tuanai. Faailoa foi ma se  finagalo o se tasi o ta’ita’i o komiuniti Samoa i Aukilani, Teleiai Edwin Puni, o loo faamoemoe o le pili lea o le a faatalanoaina i le Palemene ma e mana’omia lava  ona toe faasa’o mea sese na iai i le taimi ua tuanai.