E foliga mai e le o malilie uma sui faufautua o le Pulega a Aukilani i nisi o vaega o loo aofia i le tala faatatau o le tupe a le alii pulenuu o Wayne Brown lea ua faailoa i lipoti i le vaiaso nei. O loo aofia ai ma le siitia o rates i le 4.66 pasene ma le faatauina o mea o loo umia e le Council i le malaevaalele faavaomalo i Aukilani.
Fai mai le lipoti a le Televise Niu Sila o loo silasila Brown i le faatumuina o le $295 miliona o loo opu ai le tala o le tupe a le Council ma ia faailoa o le a faasaoina mai ai le 130 miliona a le Council pe a faatino lea tulaga.
Fai mai a ia e tatau ona faamautu e le toe siitia rates i le aai i le 2024 ma afai e le faia i le taimi nei faaiuga faigata ia, e ono feagai pea la tagata Aukilani ma le siitaga i rates totogi i le isi tausaga o sosoo mai.
Faailoa se finagalo o le councillor mai Manukau Alf Filipaina i le mataupu lea e faapea o le faaaliga talu ai nei lea a Brown ua na o se vaega lea o le tala faatatau faataitai o le tala o le tupe ma e mafai ona faailoa e le pulenuu ia tulaga i ana pepa o faamatalaga ae o ia o loo faatalitali poo a ni fuafuaga ua faatulaga e le pulenuu mo le tala atoa o le tupe.
Ua faailoa foi i le lipoti le mau a Brown afai ae faatau stake a le Council o le a faaitiitia loa aitalafu a le Council ae o loo tetee Filipaina i le faatauina o stake a le Council.
I le pei la o le councillor a le Manukau Ward ua faailoa foi e Angela Dalton o le councillor mai Manurewa ma Papakura e faapea, o ia foi o loo faatalitali i le tala faatatau atoa o le tupe a le Council.
