Ua sauni le alo o Samoa le susuga ia Justin Tafa mo lana fusuaga i le taaloga o le UFC poo le Ultimate Fighting Championship e faia i Amerika i le Aso Sa nei e saili ai lona tulaga 10 i le faatulagaga a le lalolagi i lea taaloga.

O Justin o loo lona 15 i le lalolagi i le taimi nei o ia ma lona uso o Junior Tafa mai le afioaga o Mulifanua na malaga mai le tausaga ua mavae e faalauiloa le taaloga lenei i lo tatou atunuu, ma talu ona fusu ia alo o le atunuu na manumalo uma lava i tu’i oti a la taaloga.

O le paga a Justin o le a la fetaui i le Aso Sa le alii o Rogerio De Lima o se alii mai Brazil. 

Ua faaalia foi e le tina o ia alii Samoa le afioga ia Pouli Amanda Fuaolefau Pati Tafa o le masina fou foi o le a fusu ai Junior le uso laitiiti o Justin i Las Vegas Amerika ma o loo ua malaga e tapena mo ia faamoemoe.

O Justin ma Junior e alala i Ausetalia ae na faaalia lo la agaga ia maua ni alo o Samoa e mafai ona fiafia i lea taaloga ma ia avea o se tasi o taaloga e pei o le lakapi e mafai ona faamanuiaina ai alo o lo tatou atunuu.