E lua avanoa o loo totoe mo le Ipu o le lalolagi i le itupa o tamaitai i le lakapi tai 15 o le a finauina i le Oceania Rugby Women’s Championships lea o loo faagasolo i le Gold Coast i Ausetalia.
O le taamilosaga o le a finau ai le ‘au a Fiti le Fijiana, le Cassowaries a Papua Niu Kini, le Fuifuilupe a Tonga ma le Manusina a Samoa.
O le ‘au o le a tulaga muamua mai lea taamilosaga o le a agavaa loa e tausinio i le Ipu o le lalolagi i le Tier 2 poo le Vaega 2 ae o le ‘au e tulaga lua o le a agavaa e tausinio mai i le Tier 3.
Saunoa le Pule Sili o taaloga a le lakapi a le Oceania i le lipoti a le RNZ, Frank Puletua o se taamilosaga tāua tele lenei mo le lakapi a tamaitai ma avanoa mo a tatou ‘au e tauva ai i taamilosaga a le lalolagi ma le lakapi faavaomalo.
E ono taaloga o le a faia i totonu o le tolu aso o le taamilosaga ma o le a muai fetaui Fiti ma Papua Niu Kini i le malae o le Bond University ae fetaui Tonga ma Samoa i le ‘afa o le 9 i le po ananei i le taimi a Kuiniselani.
