I le lima masina talu mai Iulai o le tausaga nei na amata sa’ili ai se Pule o le Kolisi o Sagato Iosefo i Alafua, o lea ua alu alu sa’iliga ae filifilia mai Niu Sila i le pitonuu o Otara se tamaitai faia’oga, o se Samoa ae o se tagata lotu foi o le Ekalesia Katoliko, e tauaveina lea galuega tauā.
Ua faailoa e le Komiti Faatonu o le pulega o lea kolisi maualuga i Samoa le filifilia o le faletua o Anamalia Anne Marie Letu’uga Tauiliili Li’a e na te tauaveina le tulaga pule o le Kolisi o Sagato Iosefo e amata atu i le masina o Mati o le tausaga fou 2025.
O loo faailoa i se pepa o faamatalaga mai le Komiti Faatonu o le pulega o le kolisi, agavaa ma tomai a’oa’oina o loo umia e le tamaitai pule fou, auā o ia o se faia’oga i Niu Sila.
Sa avea ma faia’oga o le gagana peletania, faauluulu foi iai nisi o galuega tau faia’oga, e lē gata i a’oga tulagalua ae o a’oga feololo poo le intermediate.
E pei ona silafia o le pule a’oga sa iai o le kolisi na faamavae i le tuana’i o ni lu’itau faigatā sa tula’i mai ona o amio a nisi o fanau a le kolisi o Sagato Iosefo, sa aafia i ni vevesi i le taulaga ma nisi o tamaiti o le kolisi o Maluafou.
O Setema o le tausaga nei na see atu le alii felela o Bro Kevin O’Malley e tauave le tulaga Sui Pule ma vaaia le kolisi, lea o le a ia faaauau lea galuega se’ia oo ina amata le tamaitai pule a’oga fou i le faai’uga o le masina o Mati o le tausaga fou.
O le faletua o Anamalia Tauiliili Li’a na soifua a’e i Niu Sila e pei ona faamautū ai i le taimi nei ma lona aiga.
Peitai e iai le talitonuga o le a siitia mai e faamautū i Samoa ona o lana galuega ua filifilia iai.
