Ua mae’a le fono faaletausaga a le faalapotopotoga o le aufaipisinisi a le atunuu le Samoa Chamber of Commerce, ma ua iai se suiga i le peresetene fou ua filifilia ma nisi o sui o lana komiti faafoe.
O le mae’a ona talanoaina o le lipoti faaletausaga a le peresetene sa tauaveina le tofiga ma talanoaina foi lana lipoti o tupe na faatino ai le filifiliga sa faamaopoopo e le ofisa o le komesina o faigapalota.
O le peresetene ua filifilia o le pule o le kamupani o le Sky Eye le susuga Faasootauloa Sam Saili, ae avea ma sui peresetene le afioga Tagaloa Nadia Meredith Hunt mai le KVA Consult.
O le teuoloa ua filifilia iai le sui o le kamupani o le Vodafone le susuga Anish Chandra ae avea ma failautusi le susuga Nuulopa Hill mai le kamupani o le Maali.
O sui o le komiti faafoe o le alii loia o Alex Su’a mai le ofisa loia o Stowers ma Su’a lawyers, susuga Alo Kolone Vaai mai le Vaisala hotel, Teuila Eteuati o le Pacific Forum Line, Fiaailetoa Charlotte Chan Mow Brunt mai le asosi o faletalimalo, Maria Lamositele mai le BOSA, Funefeai Oliva Vaai mai le WIBDI, ma Taulapapa Maria Leota mai le asosi a kamupani gaosi oloa le SAME.
O sui mai le komiti faafoe talu ai ua toe filifilia o lē sa avea ma peresetene le afioga Seulupe Michelle Macdonald, Norman Wetzell ma Tuala Leaega Pat Leota.
