O le susuga i le ta’ita’i aoao o le Ekalesia Aso Fitu Tutoatasi Samoa i Niu Sila ma le lalolagi atoa poo le ekalesia SISDAC le susug ia Pastor Alaimoana Willie Papu, ua faasee tuagalu nei ma lona auai atu poo le avea o ia ma sui auai o le mafutaga a faifeau soofaatasi i Aukilani ona ua lē atoatoa lona malosi poo le soifua maloloina.
Ae ua filifilia ai e le komiti faafoe a lea ekalesia le susuga i le faafeagaiga ia Pastor Vaai Palasi Su’a ma lona faletua ia Fasi Christine Su’a e faaauauina lea tautua a le susuga i le ta’ita’i aoao o le ekalesia i totonu o le mafutaga a faifeau faapea le Fono Faufautua a Samoa ma le Pacific Leaders Forum i Aukilani.
O le galulue faatasi o lea tafatolu o mafutaga ua fai lea ma auala poo nofoaga ua faatinoina ai nisi mataupu a Samoa i totonu lava o Aukilani aemaise ai o fesootaiga ma le malo o Samoa.
O le aoauli o le Aso Faraile na aloaia ai le auai atu i totonu o le susuga i le faafeagaiga ia Vaai ma lona faletua e fai ma sui auai o le mafutaga.
Na auai atu sui o le ekalesia SISDAC i Aukilani, o sui o le laulau o le Fono Faufautua, sui o le mafutaga a faafeagaiga faapea ma sui o le Pacific Leader Forum e molimauina lea feiloaiga fiafia.
Ae o le maualuga o lea faamoemoe ona sa auai atu iai le afioga i le Minisita o fesootaiga a Samoa ia Hon Toelupe Poumulinuku Onesemo.
O le tofa ia Ape Moemanatunatu sa fai ma sui o le ekalesia ma aiga na lua e faaleo le auga o aute o le faamoemoe ma le feiloaiga.
O le susuga i le faafeagaiga ia Vaai Palasi Su’a ma lona faletua ia Fasi Christine Su’a sa amata lolotu i totonu o le ekalesia SISDAC i le tausaga e 1999 ae o le tausaga 2009 na tofia ai loa i laua e fai ma faifeau o lea ekalesia ina ua faaiuina mai ma le manuia taumafaiga i a’oa’oga sa iai.
O loo avea nei i laua ma ta’ita’i o le ekalesia SISDAC i le Central ae o loo laua ta’ita’iina foi le faletolu o lea matagaluega e aofia ai le West, East ma le Central.
