A o tālia filifiliga mo nisi o faauluuluga o Matagaluega ma Faalapotopotoga a le Malo ua mae’a o latou taimi galulue i le ta’i tolu tausaga o konekarate, o lea ua faailoa e le Malo filifiliga ua mae’a mo le Matagaluega o le Va i Fafo ma Fefaataua’iga, le Faalapotopotoga o Eleele o Samoa, ma le Matagaluega o Galuega Tetele ma Fela’ua’iga.
O le afioga Fui Tupa’i Mau Simanu, o le Ofisa Sili filifilia fou o le Matagaluega o Galuega Tetele ma Fela’ua’iga ma ua 28 tausaga o tautua i le Malo lea na amata o le faia’oga i le a’oga o matata eseese i le tausaga e 1994 ma faaauau i le Iunivesite Aoao o Samoa. O le tausaga e 2010 seia oo mai ina filifilia o loo tautua o ia i le faalapotopotoga o Malosi’aga Tau Eletise le EPC. Faaalia i le pepa o faamatalaga o loo ia umia le faailoga tikeri maualuga o le Master in Engineering mai le Iunivesite o Tekonolosi o le aai tele o Sini i Ausetalia.
O le Matagaluega o le Va i Fafo ma Fefaataua’iga ua toe filifilia le faletua le afioga Peseta Noumea Simi e avea ma Ofisa Sili o pulega o lea matagaluega tāua a le Malo. Ua silia i le 40 tausaga o galue o ia i le Malo e pei ona sa amata mai le Matagaluega a le Palemia i le tausaga e 1979 faasolo atu ai i le ofisa o le Va i Fafo faapea le matagaluega o Tupe a le Malo. O se tasi lea o faauluuluga pito umi tausaga o ia tauave le tofiga Ofisa Sili.
O le Faalapotopotoga o Tuma’oti o Samoa le Samoa Land Corporation, ua toe filifilia iai le tofa Ulugia Petelo Kavesi ma ua silia i le 30 tausaga o lana auaunaga i le Malo. Sa amata lana tautua i le Malo i le Pulega o Tagata Tafafao mai Fafo, faapea le Faalapotopotoga o Taui mo Faalavelave Faafuasei, ae o le tausaga e 2016 na uluai filifilia ai e avea ma Ofisa Sili o pulega o lea faalapotopotoga a le Malo.
E 3 tausaga le umi o taimi galue o faauluuluga o Matagaluega ma Faalapotopotoga a le Malo.
