Ua mautu nei le sailiga o se faauluuluga fou o le faletupe o atina’e o le atunuu le Samoa Development Bank, ma ua faamaonia ai e le Kapeneta i lana fonotaga i le Aso Lulu o le vaiaso nei le filifilia o le tamalii le susuga Mua’autau Raie Silipa e tulai e tauave le pulea o le faletupe mo le 3 tausaga.
Ua suitulaga o ia i le tamaitai le afioga Faiane Susana Laulu, sa avea ma Ofisa Sili ae e lei toe talosaga mo se isi avanoa e faaauau ai lana tautua i le faletupe.
O lē ua filifilia ua 20 tausaga o galue i le faletupe o atina’e ma e tofia nei o loo faauluulu iai le vaega o tupe a le faletupe.
E toafā na faatalanoa mo le filifiliga o se tasi e avea ma Ofisa Sili o pulega ma o lē ua filifilia sa lilifa iai le faaiuga e tulai e tauave le vaaia ma le pulea o lea tautua tāua a le Malo, o le faletupe o atina’e o loo avanoa ai ona faia aitalafu mo seleni e faatino ai faatoaga, o faigafaiva ma isi pisinisi.
O Mua’autau Raie Silipa o loo ia umia faailoga mai le iunivesite o Kuiniselani i Ausetalia ma le Iunivesite a le Pasefika.
