O lea ua mae’a le filifiliga o se faia’oga ulu mo le tatou aulakapi o le Manu Samoa, ma ua faailoa mai ai le filifilia o le afioga Lemalu Tusiata Pisi, e avea ma faia’oga ulu.
E lē toe tau faailoaina lea alo ma se tamafanau a le atunuu ona sa iloga lona sao i le lakapi a o avea ma se tasi o sui o le aulakapi o le Manu Samoa, ae sa avea foi ma faia’oga lagolago mo le aulakapi lava a le atunuu i le taamilosaga o le Pacific Nations Cup i le tausaga na te’a nei 2024, faapea le Ipu o le lalolagi i le tausaga e 2023.
Faaalia i le faasalalauga ua faailoa lautele ai lea filifiliga, ua amatalia le tofiga faia’oga ulu o le afioga Lemalu Tusiata Pisi i le tapenaina o le Manu Samoa i le taaloga faitaulia ma Sikotilani i le masina o Iulai, ma o lea taaloga o le a faia i le malae o Eden Park i Aukilani Niu Sila.
O le isi tapenaga o le taamilosaga o le Ipu o le Pasefika le Pacific Nations Cup mo lenei tausaga 2025.
