Ua filifilia ai nei e le kamupani telefoni le Vodafone Samoa le tamaitai ia Haylani Kuruppu o lē sa pale mai i le tofiga o le Tausala o Samoa i le tausaga ua mavae nei e fai ma sui e tauva i le sailiga tausala a le kelope lea o le a faatautaia i le masina o Novema i Vietnam.

O le aso ananafi lea na faailoa ai i luga o upega tafailagi e le Vodafone Samoa le tofia ai o le tamaitai ia Haylani na te tauaveina lenei tofiga.

E pei ona faalauiloa ai e le Pule Sili a le Vodafone Samoa ia Rana Bose i se faatalatalanoaga i le vaiaso ua mavae a o talimalo ai i le faimalaga mai o le o loo pale i le taimi nei ia Shane Tormes na ia ta’ua ai o le vaiaso nei lea e iloilo ai talosaga a tamaitai sa talosagaina lenei avanoa.

“A faapea e mae’a lenei iloiloga mo se tamaitai e fetaui ma agavaa e fua agai i vaega e ao ina ausia mo lenei tauvaga ae lē manuia ona filifili loa lea e le kamupani se tamaitai o loo iai uma vaega e fetaui ma aiaiga o le tauvaga lenei.
“E toatele lava le mamalu o le atunuu na tuuina mai foi nisi o fautuaga ma fesiligia ai foi le tamaitai ia Haylani mo lenei tofiga peitai ona o le tulaga foi ua tofia ai mo le aupasiketi a Samoa mo taaloga a le Pasefika ae o se uo mamae a le kamupani lenei tamaitai tele foi lona sao i la matou auaunaga.”

Ae peitai o lea ua pale Kuruppu i lenei tofiga ma o se fiafiaga tele lea ia te ia e tusa ai o sana tusitusiga i upega tafailagi i lenei avanoa ua ia maua.

“Faafetaia ai le Tamā i le lagi ona o lenei avanoa faaauro o se tauvaga foi e avea ma auala e faalauiloa ai si o tatou atunuu aemaise ana tu ma le aganuu faasoa ai agavaa ma tomai o le tamaitai Samoa.

“O se fiafiaga lea mo a’u ona ua tatalaina foi se faitotoa ae o se auala foi mo tamaitai Samoa i le lumanai e tauva ai i nei tauvaga tetele ma o se faamanatu foi mo a’u ina ia faaaogā tatau avanoa ae aua le fefe.

“E faafetaia ai le kamupani o le Vodafone Samoa mo le tofiga ua tuuina mai mo a’u.”

O se aso o i luma o lea faataunuu ai le faapaleina o Kuruppu i lenei tofiga ma sauni ai ana tapenaga faatasi ma le lagolago a le Vodafone Samoa a o loma ai lenei faamoemoe.

O le tamaitai o Kuruppu sa pale mai i le Tausala o Samoa i le tausaga 2022-2023 ma avea ai o se tasi o tamaitai tauva na maualuga lona taumafai i le sailiga o le tausala o le Pasefika i le tausaga nei.

E mau taleni ma agavaa lenei tamaitai e tusa ai o le tulaga o vaega o le atina’e o le soifua manuia o tagata aemaise le talenia ai i le itu tau taaloga.

O le tausaga lava lenei a o tau faaiuiu ai lona tofiga o le tausala o Samoa na faalauiloa ai lana tusi o loo faamatalatala ai lana savaliga seia oo ina faapaleina o ia o le Tausala.