Ua iai se isi tamaitai o le atunuu ua filifilia e le pulega o le taaloga soka i Samoa e tauaveina le tulaga Ofisa Sili o le pulega o le ofisa autū o le faalapotopotoga soka a le atunuu, lea ua tusi aao ai i le afioga Faumuina Margaret G Crichton e iloa tele i lona suafa o Poly.
Sa galue i le Lakapi Samoa o se tasi o sui o le komiti faafoe i le vaega o tupe ae sa avea foi ma sui Pelesetene o le kalapu o taaloga a le Malisi.
Sa tautua i le malo ma avea ai ma Ofisa Sili lagolago i le vaega o pulega a le matagaluega o fesoota’iga ma faamatalaga faatekonolosi.
O le tele o tausaga o lotolotoi i le atina’e o taaloga ua faaalia e le faalapotopotoga o le taaloga soka ua talafeagai lelei ma lona tauaveina o le tulaga Ofisa Sili o le pulega o le taaloga soka i le atunuu.
