Ua faailoa mai le aulakapi taitoafitu ua filifilia mo le tauaveina o le igoa o Samoa i tausinioga o taaloga a le Pasefika o loo faagasolo i le atunuu o Solomona.
E toasefulu tama tane talavou o le taimi muamua lea ua latou laeiina ai le jersey lanu moana a le aulakapi fitu a le Manu Samoa.
O se tasi sa logologoa ona tala ma lona taalo malosi i le aulakapi taitoafitu a le Manu Samoa i tausaga ua mavae le susuga Afa Aiono ua filifilia e avea ma faiaoga ulu ae lagolago iai Fuimaono Soi Lalovi i le tofiga taitai malaga ma Apollos Paramore o le physio.
O le aso 23, 24 ma le 25 o Novema o le vaiaso lenei, e faagasolo ai taaloga lakapi taitoafitu o taaloga a le Pasefika lea o loo pulu faatasi ai Samoa ma ‘au mai atunuu o Tuvalu ma Vanuatu.
O taaloga a le Pasefika i Samoa i le tausaga 2019 na manumalo ai le tatou lakapi taitoafitu i le pine siliva, ae manumalo Fiti i le pine auro.
I le aulakapi taitoafitu a le Manu Samoa ua agavaa mo taaloga a le Olimipeka i Falani i le tausaga fou, o lea ua faailoa mai e le pulega o le Lakapi Samoa, ua taunuu i Niu Sila le ‘au ma tolauapi ai mo le vaiaso e tasi a o lei malaga e tausinio i vae e lua o le taamilosaga lakapi fitu a le lalolagi i Dubai ma Cape Town i Aferika i Saute.
O le vae o le taamilosaga i Dubai o le aso muamua i le aso 3 o Tesema ma le vae i Aferika i Saute ua faatulaga mo le aso 9 ma le aso 10 o le masina fou lava o Tesema.
