O loo faatali nei le tamaitai Filipino o Arriane Fae Timblique pe talia lana talosaga ua faaulu e lana loia, mo se isi toe fetuuna’iga o aiaiga o loo tatala ai i tua e faatali le masina o Tesema o le tausaga nei, e suesue ai molimau o lona moliaga o le umia ma le faaulufale i Samoa o le nakoti o le ‘aisa.

O lea tamaitai sa maua iai lea pauta faasāina ina ua malaga mai Amerika Samoa ma taunuu ai i le malaevaalele i Faleolo ma le faamoemoe e pu’e ai le isi vaalele e faaauau ai lana malaga.

Peitai o le maua o ia nakoti ia te ia ua taofia ai se’i suesue lona moliaga ua ia teena.

O loo fia alu ese ma Samoa lē ua molia ona o lana galuega o loo galue ai i se pisinisi i Amerika Samoa, ma o lana talosaga e fia tuua le atunuu o loo tetee malosi iai loia a leoleo.

O le Aso Gafua a sau le aso 2 o Setema o le a suesue ai lana talosaga pe mafai ona ia tuua le atunuu ma toe foi mai e tali i ona moliaga.