O le sauni atu o le aulakapi 15 a le Manu Samoa i lana taaloga muamua i le faai’uga o le vaiaso nei i le taamilosaga o le Ipu a le Pasefika le Pacific Nations Cup, ua faailoa mai ai e le ta’ita’i malaga le susuga Su’a Hesed Ieremia, faato’ā lua vaiaso talu ona faamaopoopo tama o le ‘au ma o se itu tāua lea i tapenaga a le faiaoga ma le pulega o le aulakapi a le atunuu.

E to’atolu tama o loo taaalo i kalapu i Amerika o le a taunuu i le faa’iuga o le vaiaso e faaopoopo i tama lakapi o le Manu Samoa ua filifilia mo lea taamilosaga. Na maua se faatalanoaga ma le ta’ita’i malaga o loo i Fiti faatasi ai ma le ‘au atoa mo lea taamilosaga faavaomalo, o le a toe fetaui ai Fiti o Tonga ma Samoa i le tuana’i o le lua tausaga e lei toe faaauauina le Ipu a le Pasefika ona o puipuiga o atunuu mai le faama’i. 

Su’a Hesed Ieremia: “O le vaiaso lea na mavae na faamaopoopo ma faamautu ai le tapenaga a le tatou ‘au i Nadi. Ia ma aga’i mai loa i le amataga o le vaiaso nei i Suva. Ia lea faato’ā lua aso o faamautu i Suva nei, mo le faamoemoe i le faai’uga o le vaiaso nei, o le a faapea ona talamalae ai le tatou ‘au i le taaloga muamua i le Ipu a le Pasefika ma le ‘au a Ausetalia A. Ia o le faatulagana lava lena o taaloga. O le vaiaso fou ona toe see lea o taaloga e faia i Lautoka, ia ma o le a toe faamautu ai foi le tatou ‘au i Nadi, i le taaloga ma Tonga i le faai’uga foi o le vaiaso fou, ia ae taualuga ai i le vaiaso i ona tua atu, i le taaloga ma le ‘au a le malo Fiti……

……..Ia o tapenaga lava ia, e pei ona faalauiloa foi i le upega tafailagi ma le autusitala ma le aufaasalalau i totonu o Fiti, ou te iloa pe ua 90 ma ona tupu pasene le maopoopoga o le numera o le tatou ‘au i le taimi lenei, a o tālia ai isi foi alo o le atunuu o loo taumafai ma malaga mamao mai Amerika, o i latou ia sa su’e siamupini kalapu o loo latou taaalo ai i totonu o Amerika, ia lea faato’ā mae’a su’ega siamupini. Lea la ua aga’i mai ma e taunuu mai i le faai’uga o le vaiaso nei. Lona uiga o le a lē mafai ona tausinio i le taaloga muamua ma Ausetalia A. Silafia foi la, i le tulaga e pei ona iai, e lē o umi se taimi e mafai ona tuufaatasi ai le tatou ‘au. Ia lea na maitau atu, o lea faato’ā aga’i mai le vaiaso lona lua lenei, taaalo loa. Ma o lu’itau na o loo feagai ma tatou i le faamaopoopoina o le tatou ‘au o le Manu Samoa, ona e malaga mamao mai kalapu eseese a le lalolagi ia le to’atele o tagata taaalo. Ae o le fiafiaga latou ia i lenei taimi, ua mafai ona maopooopo mai le isi ‘afa atoa o le ‘au e pei ona iai i latou o loo i totonu o le Moana Pasefika.” 

O se faatalanoaga ma le ta’ita’i malaga o le Manu Samoa susuga Su’a Hesed Ieremia.