Ua silia ma le 4 tausaga o taumafai le tina ia Pepe Tofilau ma lona to’alua e galuegaina lo la atina’e fai faato’aga ma fualaau’aina i totonu o Aleisa.
O nei atina’e faifaato’aga e aofia ai o koko Samoa, o faato’aga saga, o kapisi, kukama, tamato ma o loo faaauau pea ona faaaopoopo ai isi fualaau faisua ma fualaau’aina.
Ona o le faaletonu o tulaga o auala ma le faafaigata ona tau sailia se vai mo le faato’aga ta’ua e Pepe o le tele o le tupe alu o le aumai o le suavai mo le fuiina o lana faato’aga.
I se taimi e le’i mamao atu sa taulimaina ai e Pepe se tane vai 5,000 lita tauala atu i le Pacific Island Rural and Agriculture Stimulus Facility (PIRAS) mo le faatumauina o le ola lelei o le atina’e.
O lea fesoasoani na faatupe e le malo Ausetalia ma le IFAD ma o loo galulue faatasi ai ma le Matagaluega o Faato’aga ma Faigafaiva ma le faamoemoe e fesoasoani lea i le faaleleia ma atina’ega o faato’aga a le aufaifaato’aga.
Ta’ua e Pepe e tele ina faaalu le ta’i 300 i le vaiaso mo le faatauina o faagaau ina ia mafai ona oo atu le suavai i le faato’aga peitai talu ona maua lea fesoasoani o le a faasaoina ai foi lea seleni.
