Saunoa le faipule o le National, Dr Shane Reti i le RNZ o kamupani inisiua tau faigamalaga e manaomia ona latou totogi vave ane tau o uta a tagata malaga ua leiloloa.
O lana saunoaga lea ua faia e uiga i le mataupu o loo aliae ai foi nisi o finagalo i lenei vaiaso a o taumafai ai le kamupani a le Ea Niu Sila e kilia nisi o uta o loo faatuai i le auaunaga lea.
I nai vaiaso ua tuanai atu sa oo atu i le tolu itula le umi e laina ai tagata e saili a latou ato poo uta leiloloa ma ua mae’a faailoa foi e se sui o le kamupani vaalele o le a faaauau pea lea tulaga i le agai atu i masina i le lumanai.
Fai mai le lipoti e le o faatagaina pasese e saili e latou a latou lava uta ona o tulaga tau le puipuiga ma popolega mai le ofisa o le tiute ma ua faailoa ai la se finagalo o le alii faipule i le vaiaso nei e uiga i lea mataupu, ma ua tau manino mai ai le telē foi o lea mataupu ua faia ai ma sa latou feiloaiga ma le ofisa sili o le Ea Niu Sila ma sui o le malo.
Ta’ua e Reti e tatau i travel insurers ona vave totogi ane claims a tagata i mataupu faapea ma sa ia iloa lea tulaga o loo iai foi i se faaletonu ina ua ia vaaia i luga o le facebook finagalo faaalia o tagata e tusa o ia auaunaga.
Ua faamatala e le Ea Niu Sila i le Herald o loo latou faaaogaina nei nisi o metotia e faaleleia ai lenei tulaga e aofia ai le aumaia o nisi tagata faaopoopo e fesoasoani i le sailia o uta ma le faaaogaina o nisi masini faaonaponei e fesoasoani ai i le auaunaga i tagata ma galulue faatasi foi ma isi kamupani vaalele e tau faafaigofie ai le mataupu.
