Ua fesiligia e le minisita o fela’ua’iga Simeon Brown gaioiga a lē na aveina le pasi lea na fasi tigaina ai se tasi o talavou i le Aso Faraile talu ai.
E 16 tausaga o Jason Luo ua leai le tolu o ona oloa ae aafia isi e mafua mai i le faaoolima lenei a o iai i luga o le pasi i Pakuranga Road e alu agai i Panmure i Aukilani.
Ua ta’ua mai ai sa faaaogā e se tasi o tina e lē o iloa poo ai, le u’amea e sasa ai.
O molimau i tala a le 1News o lea sa taumafai se tasi o tagata matua sa iai i luga o le pasi i lea taimi e vaovao, ma a o tupu ai i luga o le pasi, e lei tu le pasi.
O tuua’iga nei a le alii talavou ua aafia nei, lea e faapea e lei alu ane foi le avepasi e fesoasoani atu i le taimi na uma ai ona fasi o ia ae na ona faaauau pea o lana pasi.
Fai mai leoleo o loo suesue pea lenei mataupu ma e oo mai ananafi e leai se isi ua molia.
Ua uma ona feiloai le aiga Aukilani ma le minisita, ma o lea ua talosaga ai le minisita i le Auckland Transport ia faia se iloiloga faasaga i gaioiga a le avepasi ua tuua’ia ae pe na ia mulimulitaia foi taiala e tatau ona ia faia i mataupu faapea.
O loo lipotia o le tele o faamatalaga a le tina na faaoolima i le talavou, o ni lafoga faailogalanu ma o le agia ai o lenei osofaiga i luga o le social media ua toatele tagata Saina ua faaalia lo latou lagolago i le aiga o Jason.
Puna o Faamatalaga: Bus attack: Transport Minister wants safety protocols reviewed (1news.co.nz)
