Ua talia e le aulakapi taitoafitu e tasi mai le motu i Salafai le ‘au a le Tamauli mai Salelologa le faasalaga ua le mafai ai ona toe taaalo i se isi taamilosaga o lenei tausaga, ae ua faaalia e le faufautua poo le technical advisor o le Tamauli le tofa Matamua Upati Salima, o le lotomaualalo ua saili ai i le filemu le faaiuga ua faia, ae o loo teena e le latou ‘au le moliaga o le uu o le ua, o le laufali mai fafo na faia le latou taaloga o le quarterfinals ma le ‘au a Fiti.

Faaalia e Matamua i se faatalanoaga anapo, e leai se ata na pueina e se televise o le taaloga e faamautu ai le tuuaiga, ae o ata na faasalalau o le latou taaloga e telefoni feaveai a nisi o le aulagolago a le latou ‘au, o loo iloa ai e lei tupu se tulaga faapea.

Faaalia e Matamua o loo iai a latou video clip e faamaonia ai le latou mau.

O le isi itu na ia faailoa mai, e iai foi se mataupu na aafia ai se tama taaalo o le ‘au a le Malisi i le lafo o ni upu palauvale i se laufali, ae sa teuteu e lei faia iai se suesuega.

Le faufautua o le aulakapi taitoafitu o le Tamauli, tofa Matamua Upati Salima.