Na lipotia e le RNZ Pacific i le aso ananafi le fesiligia e le malo o Samoa pe na faapefea ona faataga tagata faigaluega faavaitaimi e aga’i ese ma Samoa mo Niu Sila i le vaiaso nei e aunoa ma se faatagana. O tagata faigaluega uma faavaitaimi e malaga mai i Niu Sila mo galuega faapea foi i Ausetalia e tatau ona ioeina muamua e le kapeneta.

O le masina o Mati na faamālōlō lē tumau ai e le malo le scheme lea a o faia se iloiloga a le komiti faapitoa lea ua faailoa e le minisita i lea lipoti e lei mae’a le lipoti a le komiti ae leiloa pe faapefea ona felelei mai le aufaigaluega lea mo Niu Sila ae lei iai se ioega aloa’ia.

O loo ta’ua foi i lea lava lipoti se finagalo o le faauluuluga o le matagaluega Pulotu Lyndon Chu Ling fai mai a ia ua paso pe faapefea ona tulai mai lea tulaga. Talu ai nei na faailoa ai se finagalo o le Palemia o Samoa i le mataupu lea ma ia ta’ua ai o loo silasila lana faigamalo i le taofia o le faiga lea o le open recruitment mo tagata faigaluega faavaitaimi ae o loo mana’o ia faamalosia le scheme ae lē o le taofia.

 

E lei manuia taumafaiga a talafou mo se faamatalaga mai le matagaluega e tusa o lenei mataupu.