Ua tāpā e le Sui Taitai o le Itu agai le tofa Lauofo Nuafesili Pierre Lauofo se faamaninoga a le taitaifono o le komiti faapitoa a le Palemene na suesueina ni faaletonu i kopi o le tulafono fou o fanua ma suafa ma le tulafono o teuteuga o le faavae, poo ā mafuaaga ua faavae ai le fautuaga a le Komiti e toe ave i tua ma lafoa’i ia tulafono e lua na pasia ia Tesema o le tausaga e 2020.
O le fesili a le Sui Taitai o le Itu agai ma lona finagalo i le taunuuga o suesuega a le komiti suesue faapitoa, na tomua ai saunoaga faalauaitele i le lipoti a le komiti ina ua mae’a fofola e le taitaifono le afioga i le sui Fofoga Fetalai ni vaega tāua o le latou sailiiliga na mafua ai ona taunuu i le fautuaga e toe ave i tua ma lafoa’i ia tulafono.
Se vaega o le folasaga a le taitaifono o le komiti suesue faapitoa a le Palemene le afioga i le Sui Fofoga Fetalai, le tofa Auapa’au Mulipola Aloitafua. O le Aso Tofi pe a toe tauaofia le Fono Aoao Faitulafono o le a toe faaauau ai saunoaga faalauaitele a sui faipule i le lipoti a le komiti, a o lei faia se finagalo o le Palemene o le a iloa ai le teena poo le talia o le fautuaga e faasolomuli i tua le tulafono o teuteuga o le faavae ma le tulafono fou o faamasinoga o fanua ma suafa 2020.
