Ua faitioina e le ta’ita’i o le Itu Agai le susuga Tuilaepa L Sailele Malielegaoi, le faaiuga a le Kapeneta ua toe foi ai le susuga Papalii Panoa Tavita Moala, e faaauau lona tofiga ta’ita’ifono o le Komiti Faatonu o le faalapotopotoga o le faaputuga tupe o le lumanai manuia o tagata le NPF.
I le feiloaiga masani a tusitala ma le ta’ita’i o le Itu Agai, na fesiligia ai sona finagalo i le faailoa ai e le Minisita o Tupe o loo iai ma le vaaia o le NPF, o le faaiuga a le Kapeneta ina ua mae’a ona iloilo le lipoti o suesuega i ni faaseā faasaga i le ta’ita’ifono e pei ona sa faaleo i se tusi i le minisita o lea faalapotopotoga a le Malo, mai ofisa sinia o le pulega o le NPF.
Le ta’ita’i o le Itu Agai, susuga Tuilaepa L Sailele Malielegaoi.
I le feiloaiga a tusitala ma le Minisita o Tupe na ia faailoa ai le fausia o se finagalo o le Kapeneta i le taunuuga o le lipoti o suesuega a le komiti o mataupu faalotoifale o le NPF, na faaalia ai e mamā le ta’ita’ifono mai tuua’iga, ma e lei solia foi e le ta’ita’ifono ni faiga solitulafono.
Le Minisita o Tupe o loo ia vaaia foi le faalapotopotoga o faaputugatupe o le lumanai manuia o tagata le NPF, afioga Lautimuia Afoa Uelese Vaai.
