Ua leva ona nofo faatalitali le tapuaiga a Samoa i Aukilani poo a fea se taimi e vave feiloai atu ai i lana au le Toa Samoa, peitai ua avea le taamilosaga o le Pacific Championship i le va o Ausetali, Niu Sila ma Samoa ua vave lulu lima ai Samoa i Aukilani ma le Toa Samoa.
O le vaveao o le aso sa na taunuu ai i Aukilani le au a le atunuu lea sa maitauina ai le tumutumu o aiga ma uo sa agai atu i le malae vaalele i Aukilani e faatali le taunuu mai o le au.
O loo loma le taaloga ale Toa Samoa ma le au malosi ale Kiwis i le aso Toonai 21 o Oketopa, ae o le afiafi o le Aso Lua ua mavae 17 o Oketopa na tumutumu ai le Victoria Park i le city i le toatele o le atunuu na agai atu i le aso ua faapitoa mo Samoa ma le au o le Toa Samoa.
O le faamoemoe ua atofaina faapitoa mo tagata e agai atu ai e faatalofa ma tama o le au, saini igoa ma tapue faatasi a latou ata. Na vaaia le toulu o timuga i le aoauli ma le pisi o le auala i le taimi na tuua ai aoga ma manava ai glauega ae lei vaoia ai le lolofi atu o matua ma fanau ma a latou fua e faaali lo latou loto lagolago i tama fanau o Samoa o loo taaalo i le Toa Samoa.
Matie ma maualuga polokalame o le aso ina ua tulai le tapuaiga a matua matutua i Aukilani e faafeiloai le au malosi o le atunuu. Matagofie faafiaifaga pepese sa faanofo filemu ai le atunuu faatasi ai ma le to laualuina o igoa o tama taaalo, ae taualuga ai loa i le toe feei o leToa Samoa i lana siva tau.
