O le afiafi ananafi na mafai ai ona maua le avanoa ale faalapotopotoga o tagatanuu Filipaina oloo aumau i Samoa nei e feiloai atu ai ile Miss Global ia Shane Quintana Tormes e tusa ai o lona asia ai o Samoa.
O lenei faamoemoe sa faafoeina e le kamupani telefoni a le Vodafone Samoa ina ia mafai ona feiloai ai le Tausala ia Tormes ma nisi o sui o le Malo aemaise ai o le maua o le avanoa e alo ma fanau ma nisi o sui o le atunuu o Filipaina o loo aumau ai i Samoa.
I lenei feiloaiga sa saunoa ai le Minisita o Tagata Tafafao Maimoa mai Fafo, Toeolesulusulu Cedric Schuster e tusa ai o le lagolagoina o taumafaiga ma tapenaga lea o le a sailia ai se tamaitai Samoa e auai i lenei tauvaga i le tau faaiuiuga ai o le tausaga nei.
“O le taimi muamua lenei ua taunuu mai ai i o tatou laufanua se tamaitai o le lupe na faalele i le fuifui o le seuga ma ua faapaleina ai o ia o le Tausala o le Kelope.
“Ma o le feau taumolimoli a le Malo i pisinisi tuma’oti ia faaaogāina ai avanoa faapenei e faalauiloa ai Samoa i le lalolagi ma o se avanoa tāua lea mo nai alo tamaitai o Samoa e auai ai i lenei tauvaga.
“E iai lava sina o’u malamalamaaga i lenei tauvaga e iai foi nai ona eseesega ma nisi o tauvaga tetele i le lalolagi i vaega e ao ona ausia ae peitai e lē tuua ai avanoa faapenei e lē aumaua lea o loo tapena ai le Vodafone Samoa ina ia faalauiloa ai lo tatou atunuu i lenei tauvaga i Vietnam.
“Faamanuia taualumaga a le malaga mai ai o le Tausala i Samoa aemaise o fuafuaga ma le Vodafone Samoa.”
Na faatumulia lenei faamoemoe i valaaulia eseese ma maua ai le avanoa e faatino ai nisi o faafiafiaga a le atunuu o Filipaina e alo ma fanau aemaise ai o soo se tasi sa mafai ona maua le avanoa e feiloai ai ia Tormes.
