O le taimi muamua lenei talu mai paeaiga o Palemia a le Malo o Fiti ua mafai ai ona faia se feiloaiga faapea a se Palemia o Fiti ma tagatanuu Fiti o loo aumau i le atunuu.
O le Afioga Sitiveni Rabuka ma lona faletua na faimalaga mai e taliaina le faatalauula atu a le Malo o Samoa e ala lea i se valaaulia e afifio mai ai e molimauina le faamanatuina o le 61 tausaga o le Malo Tutoatasi o Samoa.
O le avanoa tāua lea na mafai ai ona faatinoina lenei feiloaiga ma ona tagatanuu o loo aumau i Samoa nei.
Na faafeiloai i se ‘ava o feiloaiga i le tu ma le aganuu Fiti, na saunoa ai le Afioga Rabuka o se avanoa tāua tele lea ua maua ai se laolao e feiloai ai ma ona tagata e faasoa ai ma faamalosiau ia i latou o loo galulue ma a’otauina i Samoa nei aemaise ai i latou ua faiaiga.
“O le toatele o outou o loo iai se savaliga tāua i lenei vaitau, o nisi o loo a’otauina i aoaoga ma ou te faamalosi atu ia te outou ina ia faamalolosi ma finafinau, ia vaai taula’i i se miti o loo e naunau e faataunuu ma le manuia.
“E leai ma se isi o loo silafia lou faamoemoe na e te mana’o ia taunuu manuia.
“O se fiafiaga tele ia te au le mafanafana o faigapaaga ma nisi taitai o Malo o le Pasefika, o loo faailo mai ia te au ma tagatanuu Fiti e taulai le vaai i se miti o loo tatou mananao iai ia taunuu.
“E iai taimi e sologa lelei ai le savaliga, e iai foi taimi e oo mai ai aso leaga ae o le faamoemoega lava ia aua ne’i o tatou fiu gofie ai ae ia onosai e tautua ma galulue auā se lumanai manuia o tatou aiga ma lo tatou atunuu o loo tapuai mai i o outou faiva.”
O lenei feiloaiga sa faatautaia lea i le Iunivesite a le Pasefika i Alafua.
