Ua agiga i lipoti i le asō se lu’itau tele o feagai ma nisi o aoga i le taumafai lea ia ausia manaoga o le faitau afe o nai tamaiti aoga e malaga mai isi atunuu i totonu o Niu Sila nei.
Fai mai se lipoti a le Newstalk ua faamatala e ta’ita’i faaleaoaoga o le faaaogāina o faletusi poo libraries faapea halls o faleaoga ua faatino ina ia taumafai ai e faaaofia se vaega tele o tamaiti ua lesitala mo aoga, ua iai foi ma lu’itau mo faiaoga ma le sailia o faiaoga tau le gagana Peretania mo tamaiti aoga e fou atu i aoga.
Ua faailoa i le lipoti lava lea o loo galulue nei le matagaluega o aoga e faaopoopo potu aoga a o agai atu i le faai’uga o le tausaga ia faafetaui ai le manaoga lea ma le faatupulaia o le numera o tamaiti.
O faamaumauga lata mai mai le Stats NZ ua ta’ua ai e 221,400 tagata na malaga mai i Niu Sila i le tausaga lenei 2024, o tagata na malaga ese ma Niu Sila e 138,600 o lona uiga e 82,800 tagata fou ua faaopoopo mai i le atunuu.
O faamaumauga o tamaiti e 5-17 tausaga na taunuu mai i Niu Sila e oo mai ia Me o le tausaga nei ua iloa ai e 21,899 i latou ia ma ua faamaonia foi e le peresetene o le asosi o puleaoga, secondary principals asssociation o Vaughan Couillault ua matuā manaomia lava nisi faiaoga faaopoopo.
Puna o Faamatalaga: https://www.newstalkzb.co.nz/news/national/schools-under-pressure-with-thousands-of-school-aged-migrants
