Ua faailoa e se tasi o fomai mo le lautele, GP i AUkilani i Saute o loo iai le popolega i le mafai ona o latou faatino a o agai mālie mai le vaitau e tetele ai le fulū.
O le faamatalaga ua faia mai ae faatoa mae’a faailoa lipoti mai le Te Whatu Ora poo le Health NZ o le flu season i le tausaga lenei o le a sili atu ona ogaoga.
O le taitaifono o le Pasifika GP, le alii fomai o Api Talemaitoga o loo iai lona popolega o le a lē mafai e GPs i Aukilani i Saute ona talitali le toatele o le a agai atu mo togafitiga aemaise le faaitiitia o le aufaigaluega ua iai nei.
I se pepa o faamatalaga mai le Te Whatu Ora Counties Manukau ua ta’ua ai sa galulue ma isi o faalapotoptoga tau le soifua maloloina mo nisi fuafuaga mo le oo mai o le tau malulu ma le pesi o le fulū ma o loo mafai ona fai le tui o le fulū e leai se totogi mo le au matutua tai 65 tausaga ma sili atu, tagata Maoli ma le Pasefika e tai 55 tausaga ma sili atu faapea tina maitaga, tamaiti 6 masina agai i le 12 tausaga le matutua aemaise i latou e iai gasegase e pei o le suka, ma’i sela ma gasegase o le fatu.
