A o tapena afioga i Faamasino o le Faamasinoga Faaitumalo ma le Faamasinoga Maualuga e toe amata tagofia matāupu tau solitulafono ma matāupu tau i le va o tagata i le vaiaso o muamua nei, o loo tālia nei e le pulega o le Matāgaluega o Faamasinoga ma le Faafoeina o Matāupu Tau Faamasinoga se finagalo o faamasino i le fautuaga mai le Kapeneta e galulue mai o latou maota se’ia vaganā le su’esu’eina o matāupu e faaaogā ai potu faamasino, ona o tapenaga o le galuega tele o le a toe faaleleia ai le maota faamasino i Mulinuu.
O se feiloa’iga ma le Ofisa Sili o le matāgaluega na faailoa ai lea fuafuaga e māfua i le leai o se maota o le malo o avanoa e faatino mai ai i se tulaga lē tumau galuega a alii ma tama’ita’i faamasino.
Se finagalo o le Ofisa Sili o le pulega o le Matāgaluega o Faamasinoga ma le Faafaoeina o Matāupu Tau Faamasinoga, le susuga Papalii John Taimalelagi Afelē.
O le masina o Aperila o loo fuafua e amata ai le galuega o le toe atoina o le Maota Faamasino i Mulinuu ua silia i le sefulu lima tausaga talu ona mae’a fausia ma faaaogā ma o se galuega tele na faatupe i se fesoasoani a le malo o Saina.
