O le palota mai fafo o tagatanuu o Samoa o aumau ma faamautu i isi atunuu, ua fautuaina e le Komisi Suesue na silasila i le faigāpalota o le 2021 ia faaauau pea le tulaga o loo iai nei.
O lona uiga e malaga mai i Samoa e lesitala ai ma fai ai lana palota. I le lipoti a le Komisi Suesue ua tauaao nei e le Palemene o loo faaalia o luitau sa faaleo i le suesuega sa tele molimau na tuuina atu e lē lagolagoina le palota mai fafo o tagata Samoa o loo faamautu ma aumau ai.
O loo faailoa i le taunuuga o lea suesuega le faitau aofai o tagata e iai pito Samoa na faamauina i le tusigaigoa a Niu Sila o le tausaga e 2018 e 182,000 ma ua aofia ai le 55,512 o tagata na fananau i Samoa.
O le Tusigaigoa a Ausetalia o le tausaga e 2016 e 75,777 tagata e iai pito Samoa ae 24,017 tagata na fananau i Samoa.
O le tuufaatasiga o tagata Samoa na fananau ilo tatou atunuu e tusa o ia faamaumauga o tusigaigoa a Niu Sila ma Ausetalia i le tausaga 2016 ma le 2018 e 79,000.
Ua faailoa e le Komisi Suesue i le latou lipoti o i latou uma ia e mafai ona agavaa e palota i Samoa auā sa fananau i lo tatou atunuu ona e agavaa i le tagatanuu poo le sitiseni.
E agavaa foi ona nonofo mau i Samoa auā sa soifua ma fananau i Samoa a o lei malaga i fafo.
Fai mai le lipoti lenei a faatusatusa le aofaiga o tagata i Samoa na palota i le faiga filifiliga tele a le atunuu ia Aperila o le tausaga 2021 lea e 98,860 e atagia ai le toatele o tagata palota faaolioli mai fafo ae lē aofia ai isi atunuu o loo aumau ai le mamalu o tagata Samoa.
Sa feiloai le komisi ma se konesale o le komisi o faigāpalota a Niu Sila ma faamaonia ai ua faamautu auala e palota sa’o mai ai i fafo tagata palota o lea atunuu o aumau i fafo, ae o se tasi o agavaa manaomia e tatau ona asiasi i Niu Sila e faatasi i totonu o tausaga vaipalota.
Faaalia i le lipoti e tulaga tutusa lava ma le faiga o loo faamamalu i Samoa i le taimi nei, e malaga mai i latou o aumau i fafo e faia lesitala ma faatino palota i Samoa.
Ua fautuaina ai e le komisi le faatuina o se komiti faapitoa e taitai ai le komesina o faigāpalota ma ona sui o le Loia Sili, le Ofisa Sili o pulega o tupe ma le Ofisa Sili o le va i fafo ma fefaatauaiga e faatino se sailiiliga i matafaioi ma aafiaga autu o le Malo pe a tatala le faatinoga o le palota o tagata Samoa mai fafo.
O galuega autu a lea komiti o le silasila i mataupu lautele o tagata Samoa o aumau i fafo, matafaioi tau palota, aafiaga tau tupe, aafiaga tau tulafono, ma aafiaga o sitiseni i atunuu i fafo ma faamanuiaga o tagata Samoa o loo aumau i fafo.
