E 2,885 alii ma tamaitai o le atunuu ua umia tomai faafaiaoga peitai o faamaumauga a le Matagaluega o Aoga Taaloga ma Aganuu ia faailoa ai e le Minisita o lea Matagaluega tele a le Mālō e na’o le silia i le to’a 700 faiaoga ua resitala ma laiseneina.
O lenei resitala e tusa lea ma aiaiga o le tulafono o faiaoga Samoa na pasia e le Palemene i le tausaga e 2016. O le faamanatuina o le aso mo faiaoga o le lalolagi na faailoa ai e le Minisita le susuga Seuula Ioane mafuaaga o le tuai ona oo atu o le toatele o faiaoga e lesitala ma faamauina aloaia.
O nisi o ia mafuaaga o le lē gafatia lea o totogi e $150 tala o le resitala ma le tele o isi tuatuagia o le galuega. O le tausaga na te’a nei na amata galulue ai le Komiti o le Fono Faatonu o Faiaoga uma i Samoa le Teachers Council e laiseme ma resitala faiaoga uma a le atunuu.
Taua e Seuula “O le resitala o le faiaoga e o faatasi ma le auaunaga lelei, o lea la o le resitalaina o faiaoga ma le laiseneina o lona uiga e tatau i le faiaoga ona matua i maualuga le faatinoga o lana auaunaga e tusa ma le agavaa ua ia maua. Ia ausia faailoga faafaiaoga maoa’e. E tatau foi ona ia te ia agatausili e faatasi ma le auaunaga pitosili ona lelei”.
Na fautuaina ai foi e le afioga i le Minisita faiaoga uma “Faiaoga e, alo i o outou faiva ma le Faamaoni ma tautuanā lo outou tofi faafaiaoga ne’i vale tuulima ona tagi uu ai lea o le loto ma le agaga. O le resitala ma le laiseneina o oe o se faiaoga o le aloaia ma le amanaia foi lena e Samoa atoa ma le lalolagi o lou valaauina”.
