I le amatalia ai o tūiga mo fanau i le 5 -11 tausaga le matutua ona o puipuiga lava o le koviti19 o le asia e le tamaitai Palemia Fiame Naomi Mataafa nisi o aoga tulagalua i Upolu na ia faailoa ai o se tulaga taua tele le tatau i matua ona faia tui o fanau aua lo latou puipuiga mai le faama’i. 

E pei ona silafia o lea ua amata atu i aoga ona unaia lea faiga ina ia mautinoa le puipuiga o fanau lalovaoa o le atunuu ma e oo atu i le 15 aoga tulagalua i Upolu ua amata ai lenei galuega tele.

O lana asiasiga foi lea na tali ai i se fesili i le faatino tatala o malaga masani i se taimi o le kuata lona lua o le tausaga ao agai atu i le masina o Iuni e faamanatu ai le atoaga o le 60 tausaga o le tutoatasi a le atunuu. 

Taua e Fiame “Ia o le faamoemoe a lena o le fesili a poo afea e tatala ai a tatou ae faalagolago a i pasene o tatou tui ua mafai ona ausia mo le puipuiga. Ae talosia i le unaiga lea e alu ai ia tatou ausia le fainumera lena. Ou te iloa ai o le toatele o tagata, ia fai o tagata lae i fafo e fia omai ma e fia malaga atu foi tatou ia ma tulaga faapena”