O le komiuniti o tagata taaalo a Ausetalia ua o latou faaigoa le faaiuga a le premier o Daniel Andrews e faaleaogaina taaloga o le taupulega sa fuafua talimalo ai, o se faiga faalumaluma ma faamā tagata.
O molimau a nisi o i latou ia ua faailoa i luga o faatalanoaga i upega tafailagi ua faaalia ai finagalo o nisi e lagona le mā pe a manatu i le faaiuga ua faia pe a mafaufau i le tele o tausaga o faia nei fuafuaga i taaloga faavaomalo i le lalolagi a o lea o le a lē mafai ona faaauau e Ausetalia.
I le mae’a o le folasaga a le premier o Vitoria Daniel Andrews ua faailoa faalauaitele ai le faaiuga o le a lē talimalo i le commonwealth games i le 2026 ona ua taugata tele le faatupeina ma ua lē gafatia.
O nisi na faailoa finagalo o pulenuu o faaitu sa fuafua e faia ai taaloga, sa o latou ta’ua e lei logoina i latou i lenei faaiuga ma faatoa logo lava i le tala i le taimi na folasia ai i luma o le autusitala ma le aufaasalalau.
