O le mea moni o le aso fou lava e aulia ma manino mai ai le tau o meatotino ua faaleagaina e Gabrielle.
O le saunoaga lea a le Palemia Chris Hipkins ananafi a o fai mai ai le minisita o tupe Grant Robertson e ono faitau piliona.
O loo faatusa e Robertson e tai tutusa ma le tau o mafuie i Canterbury lea e tusa ma le $13 piliona.
O le taimi nei o loo ave le faamuamua i fale o loo malu ai tagata ua leai ni fale, o meaai, eletise faapea itu tau fesootaiga.
O auala mo feoaiga e fai lava si faigata tele e pei ona ta’ua e Robertson ma e umi se taimi e toe faaleleia ai.
Ua ta’ua ai foi e le minisita o le a iai tupe mai nisi o aai ma poloketi o le a toesea mai e faaaoga mo nuu ua matuai faaleagaina, ma e lei maoti poo a poloketi nei o le a aafia ai.
O lea o loo iai le $40 piliona a le atunuu e mafai ona faaalu ae e lei ausia le aofai faatapulaa, peitai mai tagata suesue faapitoa e iai lo latou talitonuga e faitau selau piliona e moomia e toe faatupe ai mea ua faaleagaina.
Ua fai mai ai foi Robertson, o le isi vaega o galuega o loo faia nei o le galulue faatasi o le malo ma le vaega tumaoti, iwi faapea pulega a nuu taitasi poo local government.
