Ua lapata’ia pisinisi o le tausaga lenei e 2022 e ono fiu ai e su’e nisi tagata faigaluega ona ua lē mafai e totogi ona faafetaui le maualuga o le inflation. 

O le alu i luga o le tau o oloa ma auaunaga ua iai nei e pei ona faamauina le 7.3% i le masina talu ai, e lē o tutusa ma le alu i luga o le na o le 3% o totogi e pei ona faamauina i le kuata na faauma ia Mati. 

I lipoti e iai kamupani i le vaega o femalagaa’iga ua faia siitaga o totogi mo ana tagata faigaluega e 30%. 
O nisi ua faia vouchers e utu ai le taavale poo faatauga foi mo aiga. 

I su’esu’ega fou na faia i le tausaga nei na maua ai e latalata i le 1,000 tagata faigaluega na su’esu’eina o le 59% o i latou na maua siitaga o totogi. 

O le su’esu’ega lava foi lea e tasi na sau ai o le to’atele ua faaalia le lē gafatia ona faatau o meaai faapea le penisini o le taavale mai totogi o loo maua. 

Ua sau ai ma lapata’iga afai ae faaauau pea ona sau i lalo le malosiaga o le tupe e faatusa i le alu i luga o le tau o le soifuaga, e ono lē toe maua pe lē faatumauina foi tagata faigaluega ae ono saili galuega i fafo i atunuu faapei o Ausetalia.