Ua faamanino e le Sui Komesina o Leoleo Auapaau Logoitino Filipo o le mataupu i le tausi soifua ma le ave taavale lea na solia sā o nofoaga o loo faanofoesea ai o tagata malaga atu i Samoa e faatoa maua le avanoa a leoleo e faatino ai suesuega pe a maea aso o loo faanofoesea ai i laua.
E pei ona silafia o le tausi soifua o loo tuuaia nei na sola i tua ma le nofoaga o loo faanofoesea ai ma talia ai e se avetaavale o loo faigaluega mo le Komiti o Faalavelave Faafuasei lana talosaga e fia maua sona auala e malaga atu ai i le taulaga e tala ai sana seleni mai le masini tala tupe le ATM.
Faaalia e Auapaau e le gata na fetaui le toalua lea ma faasalaga tupe o le solia o tulafono o nofoaga faanofoesea ae o moliaga solitulafono pe a maea o latou suesuega.
O alii ma tamaitai Sikulatī o Kamupani Tumaoti o loo ofoina lea auaunaga ma tiute ai i le vaaia o nofoaga faanofoesea e le’o iai ma ni leoleo. Peitai ua faaalia e leoleo ua na’o le latou tiute e asiasi atu i ia nofoaga ma ua fausia foi se latou fesootaiga ma ia auaunaga e logo atu ai i latou pe a iai ni tulaga e aliali mai e pei o le sola ese o se tagata poo ni tagata foi mai ia nofoaga faanofoesea.
