O le tausaga nei i le masina o Iuni o le a atoa iai le 60 tausaga talu ona tutoatasi le Mālō o Samoa mai faiga faakolone ma o se tasi o vaega o loo galulue ai Komiti o Tapenaga o le tutoatasi o le faia lea o se tauvaga e saili ai se ata poo se faailoga (logo) mo lea matāti’a taua. 

E $5000 le tino i tupe o le a manumalo ai se ata o le avea ma faailoga (logo) mo le 60 tausaga o tutoatasi le atunuu ma ua faasalalau faalauaitele e le Komiti o tapenaga 2022 le tauvaga mo lea faamoemoe ma o le a toe molimauina ai sauniga masani i le tuanai o le lua tausaga o gūgū le faamanatuina o lea aso taua ona o aiaiga o vavao o le koviti19. 

O faamoemoega o le sailia o se faailoga poo se logo o le 60 tausaga ona o le tutoatasi a Samoa o se vaega taua tele i tala faasolopito o le atunuu e pei ona faamanatu pea i tausaga uma i le uluai aso o le masina 6 o le tausaga. 

Ua tatala ai nei le avanoa i tagata uma e tuona atu  ni o latou ata o se faailoga mo le sini autū o le faamanatuina o le Iupeli taimane o le tutoatasi o Samoa. 

Faaalia i se faasalalauga mai le Mālō o vaega e tatau ona faamalieina o le tatau i le faailoga ma le sini autu ona manino ma matagofie i le vaai, e tatau foi ona iai sona sootaga i vaega e pei o le faigamalaga a Samoa mai le 60 tausaga talu ai, le 60 tausaga tutoatasi iupeli taimane, le aofia uma o tagata Samoa, le lotonuu faapea le aganuu e ala lea i le mamanu faasamoa. 

O le aso 18 o le masina nei e tatau ona faaoo uma atu ai ata poo faailoga mo le faamasinoina ma aumai ai se filifiliga i se faailoga ma le sini autu o le a faamanuiaina. 

O le faailogaina o le iupeli auro poo le 50 tausaga o le tutoatasi sa faia ai foi se faamoemoe faapea i le tausaga e 2012.