Ua faagasolo se sailiiliga a le Pulega o Lakapi Samoa faapea le Asosi o Tama Taaalo Lakapi i le Pasefika faasaga i ni tuuaiga a nisi o tama lakapi taitoafitu a Samoa faia faasaga i le latou faiaoga ma le pulega o loo vaaia i latou i Dubai i le taimi nei. 

O ia tuuaiga ua faailoa i se tusi mai tama o le au taitoafitu ua momoli i le Asosi o Tama Lakapi o le Pasefika o loo latou faaalia ai na mafua ona maua tama e to’a 13 o le au i le siama o le Koviti19 ona o nofoaga na avea ai e le faiaoga ma le pulega o ni nofoaga e tumutumu ai tagata, e iai foi ma nisi tuuaiga aasaga i le faiaoga le afioga Muliagatele Brian Lima. 

Peitai ua faaalia e le Ofisa Sili o le Lakapi Samoa le susuga o Faleomavaega Vincent Fepuleai o le sailiiliga a le Pulega a le Lakapi Samoa faapea le Asosi o Tama Taalo Lapaki i le Pasefika e iloa tonu ai le moni o ia tulaga ua faaseā ai nisi o tama o le au lakapi taitoafitu a Samoa. 

Taua e Faleomavaega “O le tulaga lena e tatau ona tilotilo iai le tatou Iuni, e tatau lava ona tilotilo toto’a  iai ma faataua ni faaseā foi ua tuuina mai e tama taaalo ma tulaga faapena  i tulaga o loo iai le tatou au i o. E le gata i lena e tatau a ona faamaonia se vaega o molimau pe toatasi pe to’alua poo se vaega atoa o le au o iai se atugaluga e faasino agai le faiaoga, o le Pulega  ma le Iuni. Ua aoga foi le matou fesootaiga ma le Pacific Rugby Players Association na vaaia tama taaalo atonu o i latou tonu a ia e tatau ona talanoa ai tama taaalo ma e le’o taofia ai le tualga i le iuni lakapi e suesue ai i le faatinoga o galuega ae faapea le pulega o loo vaaia le au. A maea lea tulaga ona aumai lea o se ripoti e fai ai se faatatau a le Komiti Faatonu a le Iuni.” 

O tama o le au taitoafitu a le atunuu na aafia i le siama o le Koviti19 ua lipotia le toe malolosi uma o i latou.