O le taeao nei na faia ai se ifoga a le afioaga o Fasitoo Tai i luma o le Fale o le Malo e faamaualalo ai i le faigamalo ona o se faaaliga na faia e se matai o le nuu i luga o upega tafailagi e faifai ai i le malo fou.
Taua e le sui o le nuu Afamasaga Lino Vaili i le Radio Samoa o le Aso 5 o Fepuari na faia ai se faaiuga a faipule o le nuu e tatau ona fai se gaioiga a le nuu ona ua ta’uleagaina ai le nuu e le gata o le faifai e tagata ao le ono lē toe maua ai o ni faamanuiaga mai le malo ona o lea faaaliga.
“E lē faia toatasia e le tagata ae afaina ai le nuu, o le ala foi lena ua a’e ai se tofa i le nuu e fai se galuega faapea e pei o lenei taoaeo e fai le ifoga ma le faamaualaloga mo le malo ona o le FAST o le malo uma a tatou”.
O le matai na faia lea faaaliga ua faasala nei e le nuu e le gata o le faatea ese ma le afioaga ae ua tuu iai le faasalaga o le 100 aumatua ma o loo sailia foi se seleni. Faailoa e Afamasaga e gaioiga ia e tatau ona fai e afioaga uma ina ia faaititia ai le soona fai o faamatalaga e aafia ai nisi ae le gata i lea o le aafia ai o le afioaga atoa.
Na talia e le malo tauala atu i le Minisita o Faatoaga ma Faigafaiva Laauli Leuatea Polataivao Schmidt lea ifoga ina ua ia aveese le ietoga na pulou ai se tasi o sui o le nuu.
