O suesuega a le soā komiti a le Pulega o le Lakapi Samoa i le mataupu i se faaseā a nisi o tama taaalo mo le aulakapi taitoafitu a le Manu Samoa  ua faia ai nei ma le faaiuga a le Komiti Faafoe o le Pulega e tuua loa e le au atoa Dubai ae agai atu e faamautu i Ausetalia ma faaauau ai tapenaga mo vae o le taamailsoaga lakapi taitoafitu faavaomalo. 

E lua vae  o ia taamilosaga faaavaomalo e lei auai ai le au a le atunuu ona o le aafiaga i le vairusi o le Koviti19 lea na maua ai nisi o tama o le au. O le taunuuga foi lea o se sailiiliga a le soā komiti e faavae i le tulaga saogalemu ma le puipuiga malu o le au a’o toesea ai ma aiga o loo nofo tapuai i lo latou alofaia i taaloga faavaomalo. 

O aiaiga o puipuiga o le atunuu mai le faama’i o se isi itu taua lea o le faaiuga e faamautu i Ausetalia le au o le a maua ai se fesootaiga mafanafana ma le to’atele o le atunuu e faamautu ai ma faafaigofie ai foi a latou tapenaga. O aiaiga ia o puipuiga ua tapu ai ona toe taliu atu le au i Samoa ona e tatau ona 6 masina talu ona tuanai le aafiaga mai le faama’i ona faatoa mafai lea ona foi atu i Samoa i le maea ai o nisi suega faafoma’i ma mautinoa ua le’o toe iai ni aafiaga mai le siama o le Koviti19. 

Ua faaalia e le Sui Peresetene o le Komiti Faafoe o le Pulega o le Lakapi Samoa i se pepa o faamatalaga le afioga Afamasaga Rico Tupai e amanaia ma usitaia le finagalo o le malo i le 6 masina ua aiaia ma o le tuua o Dubai ae agai atu i Ausetalia o le au o se isi tulaga lelei lea mo le siosiomaga o tama o le au e feiloai ai ma tagata Samoa aemaise o tau aiga o loo nonofo i Ausetalia. 

Ua molimoli ai foi le faafetai a le Lakapi Samoa i le mamalu o le atunuu o loo aumau i Dubai i le fesoasoani ma le lagolago na maua e le au a’o iai i lea atunuu.