Ua valu ai nei tausaga o faaauauina pea lenei polokalame e le Aoga Tulagalua a Vaiala Beach i le faalauiloaina lea o galuega a alo ma fanau i mataupu faasaienisi.

O lenei tausaga ua faatinoina ai e fanau o le Vasega 7 ma le 8 ma sa faamasinoina e nisi o sui e iai le tomai i le faasaienisi.

Na ta’ua e le Pule Aoga o Tala Malaki o se tasi lenei o auala e vaavaai ai i le atina’e o le mataupu lenei i alo ma fanau a le aoga.

“O lenei faaaliga ua masani ai tamaiti nei auā talu mai ona faavaeina le faatinoina o le faaaliga nei i totonu o le aoga mai tausaga ua mavae ua vaaia ai le siitia o le fiafiaga o fanau e faatino experiments faasaienisi.

“O le auga foi lena o lenei faaaliga ina ia maua se fiafiaga o le tamaititi i lenei mataupu mo vasega foi o le a faaiuiu i le Level lenei o le ola aoaoina lea o le a autovaa atu i le Kolisi i le tausaga fou, o le faaaliga lenei e tapena atu ai ia oo atu i luga i vasega maualuluga ua tele lona iloa i le faatinoina o vaega nei.

“E pei ona ou ta’ua, i le taimi na amata ai ona faatino polokalame lenei tele lava ina faaaoga e fanau luga o upega tafailagi e kopi mai ai le metotia e faia ai a latou poloketi a o le taimi lenei ua faaaoga lava le mafaufau o le tamaititi ia e fai ai lana poloketi faatasi ai ma le fesoasoani o resources ia e aoaoina ai i totonu o potu aoga.

“O le isi foi vaega ua fai lava e le tamaititi ia lana ia experiment e le manao e iai se faiaoga e fesoasoani atu iai ua mafai ona maua le to’a e tautala ai e faamatala ai lana galuega na fai i luma o tagata, o i foi e iloa ai e le na o le tomai tau saienisi e aoaoina i lenei polokalame ae aoao ai foi ma isi vaega tāua e pei o le confidence o le tamaititi e tautala.”

O lenei faaaliga na faatinoina lava i le aoga i Vailima.