I le lamalama faaiu o le vaiaso muamua o fonotaga a komiti o le Fono Tele i Malua e aofia ai ma le fono a le mafutaga o tina ma faletua o faifeau o le Ekalesia Faapotopotoga Kerisiano Samoa, o lea ua faatino foi le sao masani o le sosaiete a tina ma faletua o le Tautua Puapuaga o Tagata, mo le Matagaluega o le Soifua Maloloina, o le latou foai tupe e 70 afe tala.
O lea foai o loo maualuga ai le seleni ua tuuina atu i le falemai faamamā toto i Motootua e 30 afe tala, ae 20 afe mo le falemai faamamā toto i Tuasivi i Savaii.
O auaunaga lautele a le soifua maloloina i Upolu ma Savaii ua ave iai le ta’i 10 afe tala.
O le Faatonu Sili aoao o le matagaluega o le soifua maloloina sa fai ma sui o le Minisita o le soifua maloloina ma le Malo na te taliaina le foai tupe.
