O lea ua folafola e le Ofisa Sili o le soifua maloloina a Ausetalia, Paul Kelly o le faama’i lea o le monkeypox o se faama’i pipisi ma e iai foi lona itu tāua e ao ai ona mata’ituina lelei.
O le tautalaga ua faia e le alii foma’i ua faailoa ai ua mana’omia nei ona faia iai ni polisi ma faatulaga ni auala e faailoa atili ai tulaga tau le puipuiga aemaise foi o le faaavanoa o resources a le atunuu e fesoasoani ai i ē aafia.
O le faia o lea fuafuaga ua tulai mai i le mae’a ona faailoa mai e le WHO lea faamatalaga, o le monkeypox ua avea o se public health emergency o loo popole iai atunuu faavaomalo.
I totonu lava ia o Ausetalia na faailoa mai ananafi e 44 tagata ua aafia, o le toatele o latou ia sa iai sootaga i le malaga i fafo ma toe foi mai. Fai mai o le tausaga lea e mātele ina mata’ituina ai ē o loo aafia i le taimi nei o le 21 i le 40 tausaga.
