Taunuuga manuia ma e tele mataupu tāua na mafai ona faatalanoaina i le fonotaga a faauluulu o itutino o loo faamoemoe iai feoaiga a Aukilani.
O le tala mai lea anapo a le pulenuu o Aukilani, Wayne Brown e tusa ma le fonotaga ma sui o le Auckland Transport, KiwiRail, Auckland One Rail ma sui o le ofisa o le minisita o femalagaa’iga.
O lea ua tuu atu i le KiwiRail e sau ma le fuafuaga e foia ai le faafitauli ua aafia ai le 4.4km o auala train ona o le malosi tele o le vevela ua iai nei, ma e tasi le vaiaso lea ua tuu atu iai.
O le Auckland One Rail o le a ia vaai i le utiuti o le aufaigaluega, ma e faagata lana ia iloiloga i le aso 11 o le masina fou.
I le va o pulega nei e tolu ua malilie foi o le a faia faatasi fesootaiga ma paaga lea o loo faaaogāina a latou auaunaga.
O loo ogatasi fuafuaga ma le manaoga o le minisita o femalagaa’iga, Simeon Brown ua tatau ona foia le faafitauli o itu tau femalagaa’iga i Aukilani, ma ua faafetaia ai e le pulenuu le minisita i lana lagolago.
