Ua agai sa’o se finagalo faaalia o lē sa avea ma faiaoga o le All Blacks i tausaga ua te’a o Steve Hansen i le NZ Rugby. Fai mai a ia o le mafutaga i le va o tama taaalo ma le faalapotopotoga ua i se tulaga aupito lē lelei i le taimi nei.
I le masina o Aperila e pei ona faailoa i le lipoti sa faasee ese ai foi le faia’oga o le ‘au a le Black Ferns Glenn Moore a o sauni tapenaga mo le Ipu o le lalolagi ona e faapea o loo faia se iloiloga culture review i le tulaga na iai le malaga taamilo i le Northern Hemisphere i le tausaga talu ai.
O le faia’oga foi o loo iai nei o le All Blacks, Ian Foster sa gugulu ai foi tagata i ni nai vaiaso ua te’a aemaise le faia’ina o le All Blacks i ona laufanua. I lana faatalanoaga i le Today FM ua ta’ua ai e Hansen e mafua mai lava faaletonu mai le pito i luga ma e le’i lava gaioiga na faia e le NZ Rugby e lagolago ai ana faiaoga i taimi o lu’itau.
Fai mai Hansen ua tele iloiloga ua faia ae poo afea a fai ai se iloiloga o le NZ Rugby lava ia. Fai mai Sir Steve o lona lagona e lē o sa’o le faatinoina o le galuega a le NZ Rugby i le taimi nei.
