Ua faagasolo nei le suesuega a leoleo i se tagi ua faaulu atu e ni alii talavou, ua tuuaia ai se tamaitai i ni gaioiga solitulafono taufaavalea, ona ua le toe maua tupe sa ave e lea tamaitai ma le faaupuga o ia e faia avanoa o galuega faavaitaimi.

O le Aso Tofi na tea nei, na feiloai ai nisi o taulelea talavou ma le tamaitai i le faamoemoe e tuu atu ai a latou tupe peitai e leai ni seleni na maua, i le faamatalaga a le tamaitai e le o iai se tupe ia te ia. Ua faaalia e leoleo ua faato’ai atu le mataupu, ae o loo saili lea tamaitai.

E silia i le tolusefulu tagata na ave o latou tusifolau ma tupe i le ua tuuaia ma le faamoemoe e maua ai ni avanoa e malaga i Ausetalia mo galuega faavaitaimi.

O nisi sa faailoa iai e sauni o le a tuua aiga ma nuu ma le atunuu ua manuia a latou talosaga, e oo mai i le taimi nei e lei o ese ma Samoa.